Fréttir

Upplýsingar um Frístund má finna hér. Staðfesting á skráningu og innritun fer fram fimmtudaginn 13. ágúst og föstudaginn 14. ágúst í húsnæði Frístundar í Brekkuskóla milli kl.09:00 og 14:00 báða dagana. Mikilvægt er að gengið sé frá skráningu þessa daga.

Skólabyrjun skólaárið 2009 - 2010 hefst með viðtölum við nemendur og foreldra dagana 24. - 26. ágúst 2009. Boð í viðtal verður sent út að þessu sinni í rafrænu formi í netpósti um það bil viku áður. Mat til undirbúnings viðtölunum fer fram í námsumhverfinu Mentor á vefnum mentor.is þar sem foreldrar eru beðnir um að svara spurningum ásamt börnum sínum af bestu sannfæringu. Opnað verður fyrir spurningarnar (matið) 14. ágúst 2009. Foreldrar nýrra nemenda í skólanum eru beðnir um að hafa samband við ritara skólans í ágúst til að að fá sent aðgangsorð í Mentorkerfið, hafi þeir ekki þegar fengið aðgang. Vakin er athygli á að skóladagatal næsta skólaárs er komið á vefinn og einnig námsgagnalistar (innkaupalistar)til að hafa til hliðsjónar við undirbúning skólaársins.

Skólaslitin vorið 2009 gengu að óskum. Skólastjóri þakkaði nemendum og starfsfólki fyrir veturinn og var tíðrætt um það val sem nemendur í 10. bekk standa nú frammi fyrir. Starfsfólk sem hættir nú í vor var kvatt og  þakkað óeigingjarnt starf í þágu nemenda. Nemendum voru afhent verðlaun fyrir góðan námsárangur í einstökum námsgreinum. Skólastjóri þakkaði þeim nemendum sem unnið hafa vel í félagsstarfi skólans og við fjáröflun fyrir skólaferðalag í 10. bekk. Árgangurinn sem nú kveður hefur vakið sérstaka athygli fyrir dugnað og frumkvæði við þau verkefni sem fyrir þeim lágu við fjáröflun til skólaferðalagsins. Myndir frá athöfninni má nálgast hér. Starfsfólk Brekkuskóla þakkar nemendum og samstarfsfólki sem komið hefur víðs vegar að fyrir gott samstarf og óskar öllum bjartra sumardaga framundan.

Útivistar- og vorgrilldagurinn gekk að óskum og enn eitt árið lék veðrið við okkur. Myndir eru komnar inn á myndasafnið okkar. Nemendur fóru í 18 leikjastöðvar og enduðu á að fá grillaða pylsu og Svala. Ekki var annað að sjá en að allir væru ánægðir með fyrirkomulagið. Það voru íþróttakennarar skólans sem skipulögðu leikjastöðvarnar. 

Í dag fögnuðum við sólinni með söng útivið. Heimir tónmenntakennari fór fyrir söngnum og tóku krakkarnir vel undir. "Ég vil líkjast Daníel og ég vil líkjast Rut", "Fiskinn minn nammi nammi namm", "Höfuð - herðar hné og tær" ofl. lög voru sungin af einskærri innlifun svo glumdi í öllu hverfinu. Myndir má nálgast í myndaalbúmi hér á síðunni.

Í morgun, miðvikudaginn 3. júní 2009 fór fram brunaæfing í Brekkuskóla. Æfingin var undirbúin og allt gekk að óskum. Fram komu nokkur atirði sem þarf að skoða betur og þar með er tilgangur með æfingunni orðinn mikilvægur. Við munum fara yfir þessi atriði og stefnt er að því að hafa aðra æfingu með haustinu.