Fréttir

Lokahátíð Stóru upplestrarkeppninnar 2010 í 7. bekk grunnskólanna á Akureyri, var haldin Kvosinni í  Menntaskólanum miðvikudaginn 17. mars. Keppendur voru alls 16 og stóðu sig allir með mikilli prýði. Hildur Emelía Svavarsdóttir 7. HS og Svandís Davíðsdóttir kepptu fyrir hönd Brekkuskóla. Hildur Emelía hreppti þriðja sætið. Í 1. sæti varð Aron Elvar Finnson úr Glerárskóla, Kjartan Atli Ísleifsson keppti fyrir Síðuskóla og lenti í 2. sæti. Við í Brekkuskóla óskum keppendum öllum innilega til hamingju með árangurinn.

Í Comeniusarverkefni I þar sem Brekkuskóli er einn af þátttökuskólunum fer nú fram heimsókn kennara og skólastjórnenda hér í Brekkuskóla. Þegar hafa gestirnir fengið kynningu á Akureyri, Mývatni, Hrísey og að sjálfsögðu á skólanum okkar. Framundan eru fundir kennara og heimsókn í VMA og Norðurorku ásamt fleiru skemmtilegu. Eitt af því sem kennarar og skólastjórnendur munu gera í þessari ferð er að elda og borða saman í Brekkuskóla. Sjá myndir frá heimsókninni.

Í dag lagði Halldór Jörgensson, framkvæmdastjóri Microsoft Íslandi af stað í hringferð um landið í samvinnu við SAFT og er áætlað að ferðin taki um viku. Á leiðinni mun Halldór ræða netöryggi og nýsköpun á opnum fundum í skólum fyrir börn, unglinga og foreldra.  SAFT - samfélag, fjölskylda og tækni, er vakningarátak á vegum samtakanna Heimilis og skóla um örugga tækninotkun barna og unglinga. Er megintilgangur ferðarinnar sagður að hvetja til ábyrgrar hegðunar í rafrænum samskiptum og vekja fólk til umhugsunar um hvernig börn og fullorðnir geti varast ýmsar þær hættur sem fylgt geta netnotkun.           

Í dag, mánudaginn 22. febrúar komu til okkar gestir frá Spáni. Gestirnir eru meðlimir í Comeniusarverkefni sem við erum aðilar að. Nemendur og kennarar hópsins voru boðnir velkomnir í morgun á sal skólans og fengu hressingu frá íslenska hópnum sem skipaður er nemendum okkar úr spænsku vali í 8. - 10. bekk.

Framundan er vetrarfrí í Brekkuskóla dagana 17. - 19. febrúar. Nemendur mæta aftur í skólann mánudaginn 22. febrúar samkvæmt stundaskrá. Megið þið eiga góða daga framundan með fjölskyldu og vinum. Starfsfólk Brekkuskóla.

Fyrirhugað var að fara í Hlíðarfjall á útivistardaginn þann 16. febrúar 2010, en þeirri ferð hefur verið frestað fram í marsmánuð og verða upplýsingar um það settar hér inn síðar.  

Að lokinni vel heppnaðri árshátíð verður því tekið rólega í dag föstudaginn 12. febrúar 2010. Nemendur ásamt starfsfólki mun nýta daginn í frágang og slaka svo á með ýmsum hætti. Dagurinn mun verða styttri en venjulega hjá 1. - 7. bekk og fara allir heim að loknum hádegisverði. Skoðið myndir frá árshátíðinni og undirbúningi hennar:   yngsta stig           miðstig           unglingastig Í kvöld ætlar 7. - 10. bekkur síðan að loka hátíðinni með balli á sal skólans þar sem hljómsveitin Manhattan og DJ  Doddi Mix stjórna stuðinu frá kl. 20:30 - 24:00. 7. bekkingar verða á ballinu til kl.22:30 Verð 1000 kr. 8. - 10. bekkur og 700 kr. fyrir 7. bekkinga Góða skemmtun!  

Sveit Brekkuskóla sigraði í sveitakeppni barnaskóla sveita á Akureyri og nágrenni sem fór fram í dag. Sveitin fékk 9,5 vinning af 12, hálfum vinningi meira en sveit Glerárskóla sem hefur unnið keppnina síðustu þrjú ár.  Glerárskóli  fékk 9 v. Í þriðja sæti varð sveit Lundarskóla með 5,5 v og í 4. sæti var sveit Valsárskóla með 0 v. Í sveit Brekkuskóla eru þeir Andri Freyr, Ægir, Kristján, Magnús og Mikael Máni. Við óskum skáksveitinni okkar innilega til hamingju með sigurinn! Það skal tekið fram að Akureyrarmót í yngri flokkum hefst mánudag 8. febrúar kl. 16.30. ( Af vef Skákfélags Akureyrar)