Fréttir

Upplestur í ljósaskiptunum. Haust- og vetrardagarnir eru afar stuttir á Norðurlöndunum. Áður fyrr, fyrir tíma sjónvarps og internets, voru upplestrar og sögustundir á myrkum vetrardögum útbreidd og vinsæl hefð. Þann 9. nóvember 2009 hefst Norræna bókasafnsvikan í 13. sinn og hefur það að markmiði að glæða gömlu norrænu frásagnarhefðina nýju lífi. Vikan er full af upplestrum, listsýningum, rökræðum og ýmsum öðrum menningarviðburðum sem fara fram á bókasöfnum, í skólum og víða annars staðar um öll Norðurlöndin og Eystrasaltsríkin.

Í gær komu nokkrir nemendur Tónlistarskólans fram á sal skólans þar sem þau spiluðu fyrir 1. - 4. bekk Brekkuskóla. Tónlistarnemendurnir allir eru nemendur í Brekkuskóla og erum við afar stolt af að eiga þau að. Spilað var á hljóðfærin selló, fiðlu og píanó. Þökkum við Tónlistarskólanum kærlega fyrir að bjóða upp á þessa tónleika.

Framundan er haustfrí 2009, mánudaginn 26. október og þriðjudaginn 27. október eru haustfrídagar. Nemendur eru einnig í leyfi miðvikudaginn 28. október þar sem þá er starfsdagur starfsfólks Brekkuskóla. Þann dag er Frístund lokuð. Nemendur mæta aftur samkvæmt stundaskrá fimmtudaginn 29. október 2009.

Miðvikudaginn 14. október 2009 verður brunaæfing í Brekkuskóla kl.10:50. Nemendur hafi með sér skófatnað í kennslustofur eftir fyrri frímínútur að þessu sinni. Starfsfólk skólans kynnir sér og fyrir nemendum sínum rýmingaráætlun í handbók á starfsmannavef. Teikningar af bráðaútgönguleiðum eru í öllum kennslustofum ásamt nafnalistum nemenda. Gangi okkur vel!

Föstudaginn 9. október 2009 las Þorgrímur Þráinsson rithöfundur upp úr nýjustu bók sinni "Núll Núll 9"  fyrir 8. - 10. bekk, en með bókinni fylgir Þorgrímur eftir bókunum Svalasta 7an og Undir 4 augu sem nutu mikilla vinsælda. Engu að síður er nýja bókin sjálfsstætt framhald. Brot úr köflum bókarinnar má finna hér. Fleiri upplestrar eru væntanlegir og þá fyrir yngsta- og miðstig 24. nóvember, en þá er von á Gerði Kristnýju rithöfundi.

Í næsta nágrenni við skólann, nánar tiltekið í Punktinum sem er til húsa í gamla Barnaskóla Akureyrar, er að finna fjölbreytt úrval námskeiða  sem stendur öllum bæjarbúum  til boða. Fjölskyldur og vinir ættu að skoða þennan möguleika. Halldóra Björg umsjónarmaður Punktsins veitir allar upplýsingar um námskeiðin og opið starf Punktsins í síma 460-1244 Verið velkomin á Punktinn. Bergljót Jónasdóttir forstöðumaður tómstundamála netfang: punkturinn@akureyri.is heimasíða: www.akureyri.is/rosenborg

Þann 12. – 17. október n.k. verður svokölluð Rauðakrossvika þar sem starf félagsins verður kynnt fyrir landsmönnum. Að þessu sinni verður áherslan lögð á að kynna  það frábæra starf sem sjálfboðaliðar víða um land vinna á sviði neyðarvarna, skyndihjálpar og sálræns stuðnings ásamt því að safna fleiri sjálfboðaliðum en nokkru sinni áður hefur verið gert á svo skömmum tíma. Stefnt verður að því að safna sjálfboðaliðum í LIÐSAUKA sem verður hluti af viðbrögðum Rauða krossins á neyðartímum þegar þörf er á fjölmennu hjálparliði.

1. bekkurinn gerði sér lítið fyrir og fór í kartöfluleiðangur föstudaginn 25. september ásamt kennurum sínum. Nágrenni skólans okkar er dásamlegt. Í umhverfinu er allt sem góður skóli getur hugsað sér að hafa og má segja að allt sem hugsast getur er einnig í göngufæri frá skólanum, hvort sem um er að ræða sjó, gróður, list, þjónustu eða stofnanir. Að þessu sinni tóku börnin að vísu Strætó heim, enda margir með þunga poka. Kíkið endilega á myndirnar hér. 

Í ár, 30. september, er fjórða árið sem Forvarnardagurinn er haldinn að frumkvæði forseta Íslands. Dagurinn er haldinn í samvinnu við ýmsa aðila sem koma, með einum eða öðrum hætti, að málum unglinga. Dagskráin fer fram í 9. bekkjum grunnskóla um land allt þar sem nemendur eru beðnir um að taka virkan þátt í umræðum um forvarnir gegn fíkniefnum. Hér í Brekkuskóla mun dagskráin fara fram 30. september, kl. 10:20-12:00 í sal skólans. Nánari upplýsingar um forvarnardaginn má nálgast að vefsíðu verkefnisins.