Fréttir

Brekkuskóli stóð sig vel í gríðarlega harðri og jafnri keppni og hafnaði í sjöunda sæti með 35 stig. Holtaskóli í Reykjanesbæ sigraði með 60 stig, í öðru sæti varð Lindaskóli með 59 stig og Grunnskólinn á Ísafirði varð í þriðja sæti með 51 stig. Fulltrúar skólans í keppninni voru þau Stefán Trausti Njálsson, Kara Knutsen, Alda Ólína Arnarsdóttir og Oddur Viðar Malmquist.

Verðlaun þessi eru sannkölluð þjóðarverðlaun því hver og einn getur sent inn sínar tilnefningar. Við höfum flest skoðanir á því hvað sé góður kennari, frábært námsefni ellegar góður skóli. Því viljum við hvetja alla til að senda inn tilnefningar um þá sem þeir telja að hafi gert góða hluti og eigi skilið að fá Íslensku menntaverðlaunin, og þannig vekja athygli á því sem vel er gert í íslenskum grunnskólum. Verðlaunaflokkar 1. Skólar sem sinnt hafa vel nýsköpun eða farsælu samhengi í fræðslustarfi. 2. Kennarar sem skilað hafa merku ævistarfi eða á annan hátt hafa skarað framúr. 3. Ungt fólk sem í upphafi kennsluferils hefur sýnt hæfileika og lagt alúð við starf sitt. 4. Höfundar námsefnis sem stuðlað hafa að nýjungum í skólastarfi. Nánari upplýsingar á www.forseti.is. Tilnefningar skal senda hvort sem er til skrifstofu forseta Íslands, Staðastað, Sóleyjargötu 1, 150 Reykjavík, eða á menntaverðlaun@forseti.is Síðasti skiladagur tilnefninga er þriðjudaginn 10. maí 2011.

Það er margt hægt að gera á bókasafninu!

Í síðasta tíma voru brjóstholslíffæri krufin (hjarta og lungu). Nemendur unnu af miklum áhuga og urðu margs vísari! Myndir má sjá hér...

Í gær fór einn sjöundi bekkurinn í vinnu við að efla hópandann. Hver nemandi dró miða með nafni bekkjarfélaga. Um bekkjarfélagann þurfti sá sem dró að skrifa eina jákvæða setningu. Unnið var með nafnorð og lýsingarorð í tengslum við þessa vinnu. Afraksturinn kom nemendum skemmtilega á óvart og að lokum var farið í hugmyndavinnu um hvernig ætti að gera vinnuna sýnilega. Niðurstaðan varð stór hönd þar sem smærri hendur sýna textann.

Í dag, föstudag, var þema frá klukkan 8:00 – 10:00 með yfirskriftinni samvinna og samskipti. Vinnan er hluti af Olweusarvinnu Brekkuskóla. Hóparnir voru aldursblandaðir og þrír bekkir í hverjum hóp. Mikil ánægja var með vinnuna hjá nemendum og starfsmönnum. Myndir af vinnunni má sjá hér... og undir myndir á grænu valstikunni.

Á föstudaginn fór fram skólahreystikeppnin i Íþróttahöllinni. Þar fór Brekkuskóli með sigur af hólmi. Þátttakendur frá skólanum voru: Alda Ólína, Kara Guðný, Oddur Malmquist og Stefán Trausti. Við óskum þeim til hamingju með sigurinn.

Mánudaginn 28. mars verður flóamarkaður og kaffisala í Brekkuskóla frá klukkan 18 -20. Klukkan 20 hefst skemmtikvöld, aðgangseyrir inn á skemmtikvöldið er 500 kr. (má borga meira) Allur ágóði fer til styrktar fyrrum bekkjarfélögum okkar sem fluttu til Christchurch á Nýja-Sjálandi og misstu heimili sitt í jarðskjálftanum. Vonumst til að sjá sem flesta. Nemendur í 10. bekk í Brekkuskóla