Fréttir

Í myndagalleríinu okkar eru komnar myndir frá listgreinum sem enginn ætti að láta fram hjá sér fara. Heimilisfræði Textílmennt Myndmennt, hönnun og smíði.

Miðvikudaginn 10. desember tóku kennarar Brekkuskóla þátt í klukkutíma kóðun (forritun) "Hour of code". Átta drengir úr 5. bekk leiðbeindu kennurum, en þeir höfðu fengið þjálfun í upplýsingatæknitímum hjá kennara sínum Sigríði Margréti Hlöðversdóttur. Drengirnir stóðu sig með prýði, voru hvetjandi og að því er virtist ánægðir með kennara sína. Myndir frá klukkutíma kóðun á kennarafundi.

Í Brekkuskóla kynnum við klukkutíma kóðun (forritun) fyrir nemendum og kennurum. Klukkutíma kóðun/forritun "The Hour of Code" er alþjóðlegt verkefni sem  tugmilljónir nemenda frá 180+ löndum taka þátt í. Engin reynsla er nauðsynleg til að taka þátt í klukkutíma kóðun/forritun og hún hentar öllum á aldrinum 4 - 104 ára, eins og segir í kynningunni þeirra. Nánari kynning á verkefninu er hér. Code heldur úti nokkrum verkefnum sem má finna í kóðastúdíóinu þeirra á Code.org   Kóðaðu með Önnu og Elsu.Þetta skemmtilega verkefni hefur verið útbúið til að vekja sérstaka athygli á forritun. Forritun er hér notuð sem leið til að fylgja Önnu og Elsu þegar þær kanna töfra og fegurð íssins. Í verkefninu er snjókorn og mynstur búið til með því að láta þær skauta um ísinn og svo getur þú einnig búið til eigin vetrarveröld til að deila með vinum! Hægt er  að taka þátt í Frozen forritun hér, sem inniheldur um leið góðar leiðbeiningar. Prófaðu endilega. Staðreyndir um forritunarvikuna.

Myndir af afrakstri listgreinatíma í smíðum og myndmennt eru komnar í galleríið okkar. Jólasveinarnir prýða nú  gluggana á brúnni samkvæmt hefðinni og smíðaðir hlutir á sýningarborðum bera einnig keim jólanna með sér. Sjá myndasafn.

Sáttmáli um upplýsinga- og samskiptatækni í Brekkuskóla hefur verið samþykktur á lýðræðislegan hátt. Drög að sáttmálanum voru lögð fram í október 2014 bæði í Fréttabréfi skólans og í auglýsingu í matsal. Skólasamfélagið var hvatt til að koma með ábendingar og ræða innihald sáttmálans og skila þeim í lokað hólf eða á uppgefin netföng. Fjórar ábendingar bárust stýrihópnum sem tekið var tillit til. Sáttmálinn verður færður inn í bækling skólans um umgengnisreglur og skýr mörk við næstu umbætur á honum. Sáttmálinn tekur mið af gildum skólans.

Fréttabréf desembermánaðar  er komið út. Meðal efnis er dagskrá litlu jóla 19. desember og viðburðadagatal. Lögð er áhersla á mikilvægi endurskinsmerkja þegar við erum utandyra í snjólausu skammdeginu og birt eru sýnishorn af myndum frá árshátíð skólans sem haldin var í nóvember. Fleiri myndir má nálgast hér á vef skólans.

Af vef Námsgagnastofnunar: Í tilefni fullveldisdagsins 1. desember er upplagt að skoða vef Námsgagnastofnunar með áhugaverðu efni sem tengist deginum. Svanhildur Kr. Sverrisdóttir og Ingólfur Steinsson eiga heiðurinn að vefnum og þar má finna ýmsan fróðleik, kennsluhugmyndir, ljóð og fleira.

Nú er aðventan í þann mund að ganga í garð og margir bíða óþreyjufullir eftir jólunum. Þá er ekki úr vegi að stytta sér stundir og glíma við skemmtilegar þrautir. Athugið að jóladagatalið verður ekki virkt fyrr en 1. desember. Opna síðuna í Dagsins önn  

Föstudaginn 5. desember verður Dagur íslenskrar tónlistar haldinn hátíðlegur og af því tilefni munu allar útvarpsstöðvar landsins spila þrjú íslensk lög samtímis kl. 11.15. Íslendingar geta því sameinast við viðtækin og sungið lög til heiðurs íslenskri tónlist. Markmiðið er að fá sem flesta til að kveikja á útvarpinu klukkan 11.15 og syngja með. Tilvalið er að safnast saman á sal þar sem slíkur er til afnota til að allir geti sameinast í söng. Í Brekkuskóla ætlum við að vera með söngsal þennan dag. Nánara skipulag: kl. 11:10 1. - 3. bekkur kl. 11:40 - 12:00 8. - 10. bekkur - ath. breyting! kl. 12:00 - 12:20 4. - 6. bekkur Hér er auglýsing með dagskránni. Nú er bara að æfa :-)

Fimmtudaginn 20. nóvember kl. 09:00 var rýmingaræfing/brunaæfing í Brekkuskóla. Samkvæmt rýmingaráætlun fara allir nemendur skipulega í röð, þegar út er komið, á sparkvellinum og malbikaða vellinum við hliðina á honum. Myndina tók Hjördís Óladóttir kennari.