Fréttir

Skólamyndir Brekkuskóla eru nú tilbúnar til pöntunar á vef ljósmyndarans.  Leiðbeiningar og frekari upplýsingar er að finna hér aftar í fréttinni.

SAMTAKA, svæðisráð foreldra nemenda í grunnskólum Akureyrarbæjar, í samstarfi við Guðjón H. Hauksson, þjónustustjóra tölvudeildar MA og Gunnlaug Guðmundsson, forvarnarfulltrúa hjá Akureyrarbæ, stendur fyrir málþingi um heilbrigð tölvukerfi heimilanna. Málþingið sem ber heitið „Uppeldi í tölvuvæddum heimi – ábyrgð allra“ verður haldið í sal Brekkuskóla, 14. mars n.k. og hefst klukkan 18.00.  Dagskrá:

Meðal efnis í fréttabréfi marsmánaðar er Stóra upplestrarkeppnin, frásögn af heimsókn erlendra gesta, matseðill mánaðarins og skólaljósmyndataka, en myndirnar eru nú tilbúnar á vef ljósmyndarans til pöntunar. Fréttabréf marsmánaðar

Stóra upplestrarkeppnin í 7. bekkjum grunnskólanna á Akureyri fór fram í Menntaskólunum á Akureyri (MA) þann 6. mars 2013. Aðallesarar Brekkuskóla voru þær Helga María Guðmundsdóttir 7. EJ og Sólrún Svava Kjartansdóttir 7. HS. Það er skemmst frá því að segja að Helga María var valin af dómnefnd í 1. sæti keppninnar. Keppendur allir stóðu sig með stakri prýði og eins og Karl Frímannsson fræðslustjóri orðaði það "Þið eruð öll sigurvegarar, þið stóðuð ykkur svo vel" Ingibjörg Einarsdóttir sagði í ávarpi sínu að undirbúningur þessarar keppni skipti miklu máli. Hún sagðist vita að þar liggi mikil vinna að baki og þakkaði þeim fjölmörgu nemendum, starfsfólki skólanna og foreldrum fyrir samstarfið og þátttökuna við undirbúning keppninnar. Í upphafi og í hléi spiluðu nemendur úr 7. bekk sem stunda nám í Tónlistarskóla Akureyrar. Í þeirra hópi voru fimm fulltrúar frá Brekkuskóla sem við erum afskaplega stolt af. Þar af voru báðir fulltrúar skólans í upplestrarkeppninni. Auk þeirra voru það Arndís Atladóttir á píanó, Heba Karitas Ásgrímsdóttir fiðlu og Edda Kristín Bergþórsdóttir fiðla. Stjórnendur og starfsfólk Brekkuskóla óskar Helgu Maríu og 7. bekk til hamingju með árangurinn! Nánar um keppnina á landsvísu hér og myndir frá lokahátíðinni á Akureyri hér

Skólahaldi er alla jafna ekki aflýst nema í verstu veðrum og þá gjarnan í öllum skólum bæjarins. Slíkt er ávallt auglýst í útvarpi. Skelli á vont veður meðan börnin eru í skólanum eru foreldrar beðnir um að sjá til þess að þau verði sótt eins fljótt og auðið er eftir að skóla lýkur.

Í síðustu viku fór fram undankeppni fyrir Stóru upplestrarkeppnina í 7. bekk en lokakeppni skólanna á Akureyri  fer fram þann 6. maí í Hólum í Menntaskólanum á Akureyri. Aðallesarar Brekkuskóla verða: Helga María Guðmundsdóttir 7. EJ og Sólrún Svava Kjartansdóttir 7. HS Varamenn þeirra eru: Arnór Gjúki Jónsson 7. HS og Ólafur Stefán Oddsson Cricco 7. HS Til hamingju öll með frábæran árangur! Hér má finna nokkrar myndir frá keppninni

Hér er boðað til kynningarfundar um framhaldsnám í Menntaskólanum á Akureyri og Verkmenntaskólanum á Akureyri. Fundurinn verður á sal Brekkuskóla föstudaginn 1. mars kl. 8:00 -9:30 u.þ.b. Þar munu náms- og starfsráðgjafar skólanna tveggja kynna nám og starf í sínum skólum og svara fyrirspurnum foreldra en eins og þið hafið væntanlega orðið vör við þá hafa nemendur nú farið í heimsókn í báða skólana á vegum Brekkuskóla.

Þessa dagana erum við með fjölþjóðaverkefni í gangi sem Brekkuskóli tekur þátt í ásamt 6 öðrum skólum í jafn mörgum löndum í Evrópu. Verkefnið heitir „Working together“ og  er styrkt af Comeniussjóði Evrópusambandsins.  Núna eru í heimsókn 18 kennarar frá öllum löndunum og verða þeir fram á miðvikudag.

Við fengum heimsókn frá Þjónustu og þekkingarmiðstöð fyrir blinda. Nemendur í 4. bekk fengu fræðslu sem snýr að því hvernig það er að vera blindur eða sjónskertur. Þau fengu einnig fræðslu í því hvernig við  umgöngumst blinda einstaklinga og hvernig við getum best aðstoðað þá. Þar að auki fengu nemendur að prófa ýmis hjálpartæki og setja upp mismunandi gleraugu sem sýna vel hvernig sjónskertir einstaklingar sjá. Þau fengu að vita að birta og stækkun er það sem skiptir blinda og sjónskerta mestu máli. Í 4. bekk er nýr nemandi sem er lögblindur. Hann heitir Bjarmi og er mjög duglegur drengur. Hér má nálgast myndir frá fræðslunni og myndskeið þar sem einn hópurinn prófar blindrastaf með aðstoðarmanni.

Hundrað daga hátíð 1. bekkjar fór fram nú nýverið þar sem nemendur í 1. bekk fögnuðu að fyrstu 100 skóladögunum er lokið. Frá því börnin hófu skólagönguna hafa þau talið hvern dag, sett þá í tugi og nú voru tugirnir orðnir 10 sinnum 10! Þá var mál til komið að fagna! Hér má finna nokkrar myndir frá hátíðarhöldunum þar sem þau töldu 10 stykka af hverju sem í boði var og settu í kramarhús.