Fréttir

Sumardagurinn fyrsti er fimmtudaginn 25. apríl n.k. Hann er almennur frídagur og því enginn skóli.  Föstudaginn 26. apríl er starfsdagur starfsfólks í Brekkuskóla. Þetta er leyfisdagur nemenda og því engin kennsla. Gleðilegt sumar!

Við innlit í náttúrufræðikennslu hjá Hönnu Dóru föstudaginn 12. apríl voru nemendur í óða önn að kryfja brjóstholslíffæri úr svínum. Nemendur hafa undanfarið verið að læra um blóðrásarkerfi og öndunarfæri og var þetta lokahnykkurinn í þeirri fræðslu. Nemendur þurftu að finna helstu æðar sem liggja til og frá hjartanu, skoða virkni lungnanna og sjá hvernig þessi líffæri vinna saman. Þennan sama dag var tilbreytingadagur þar sem nemendur klæddust óhefðbundið. Skemmtilegur dagur! Hér eru fleiri myndir frá verkefnavinnunni

Kennarar Brekkuskóla sóttu iPad vinnustofu hjá Epli.is þar sem þeir prófuðu margvísleg smáforrit "öpp" til kennslu. Spjaldtölvur og snjallsímar skapa nýja vídd í kennslu. Tæknin er að breyta því hvernig kennarar kenna um leið og tæknin er að breyta því hvernig nemendur læra. Brekkuskóli hefur sérstaklega verið að skoða hvernig tæknin getur hjálpað nemendum með sérþarfir, en einnig hafa nokkrir kennarar prófað sig áfram i hópvinnu með iPad. Kennarasíður Epli.is eru hjálplegar þegar velja á smáforrit fyrir kennslu.

Í upplýsingaverinu okkar, skólabókasafninu, er oft líf og fjör. Hér eru nokkrar myndir sem sýna fjölbreytta starfsemi. Hér er það frjáls tími sem er nýttur í að tefla, lesa, spila og að læra dönsku. Myndir úr upplýsingaverinu Myndskeið - nota tímann til að læra dönsku

Það var líf og fjör í brekkum Hlíðarfjalls í dag þegar nemendur Brekkuskóla um 450 talsins komu á staðinn. Hér má finna nokkrar myndir frá vel heppnuðum útivistardegi.

Föstudaginn 12. apríl fór fram upplestrarhátíð í 4. bekk. Hátíðin er liður í því að efla börnin í að koma fram og lesa upphátt fyrir áheyrendur. Hátíðin hófst með tónlistaratriði þar sem nemendur sungu lagið "Mamma fær það bezta". Því næst tók við flutningur á ljóðum og smásögum samkvæmt neðangreindum lista. Nemendur skiptust á að lesa á ýmsan máta, einir í pontu og jafnframt saman í hóplestri. Strákar og stelpur lásust á þar sem strákarnir fóru með hlutverk drengsins og stúlkurnar hlutverk lækjarins í ljóðinu "Drengurinn og lækurinn". Aðstandendum barnanna var boðið á sal til að hlusta og var vel sótt. Í lok hátíðarinn afhenti Jóhanna María skólastjóri nemendum viðurkenningarskjal. Myndir frá hátíðinni

Í 1. bekk var verið að mæla breiðasta brosið þegar aðstoðarskólastjóri leit við hjá þeim. Skemmtilegt verkefni það og átti vel við tilbreytingardaginn sem fólst í að stelpur klæddust strákalegum fötum og strákar stelpulegum fötum. Gaman saman!

Það var líf og fjör í skólanum föstudaginn 12. apríl þegar nemendur og starfsfólk mættu í skólann. Nemendafélag skólans ákvað í samráði við skólastjóra að hafa svokallaðan "klæðskiptingardag" þar sem stelpur klæðast hefðbundnum strákafötum og strákar fara í hefðbundin stelpuföt. Umræðan hefur leitt til þess að óljóst virðist vera hvar mörkin liggja. Í dag eru flestir eins klæddir. Aðalatriðið með þessari hugmynd er uppbrot sem einn þáttur í að gera skólalífið ennþá skemmtilegra  og engin skylda að vera með. Myndir 1 Myndir 2

Frétt af vef skákfélags Akureyrar: Skólaskákmót Brekkuskóla var háð í dag, 9. apríl. Keppendur voru 18 talsins og tefldu 5. umferðir eftir Monrad-kerfi.  Fráfarandi meistari, Andri Freyr Björgvinsson, vann mótið örugglega með fullu húsi vinninga og varði þar með titilinn frá fyrra ári. Baráttan um 2. og 3. sætið var hinsvegar afar hörð og má segja að hún hafi ráðist í viðureign Ólivers og Magnúsar þar sem sá síðarnefndi missti drottninguna í flókinni stöðu og mátti eftir það ekki við margnum.Óliver Ísak varð með sigrinum sigurvegari í yngri flokki.

Morgunstund gefur gull í mund. Hér má finna nokkrar myndir sem teknar voru á leiðinni í skólann 5. apríl 2013. Margir koma gangandi í skólann en einhverjir eru farnir að koma á hjólaleiktækjum. Huga þarf vel að öryggisútbúnaði þegar börn koma á hjólaleiktækjum. Hægt er að geyma hjálma í fatahengjum en hjólaleiktæki þarf að geyma utandyra. Hjólagrindur eru á nokkrum stöðum við skólann sem nemendur geta fest leiktækin við með lás. Nú svo viljum við minna á hafragrautinn okkar góða kl. 07:45 - 08:00 á morgnana í matsal.