Fréttir

Fréttabréf desembermánaðar er komið út. Í fréttabréfinu má finna upplýsingar um skipulag árshátíðar í dag, skipulag Litlu jóla dags, upplýsingar um sölu ljósmynda til 1., 4., 7. og 10. bekkja og síðasta en ekki síst viðburðadagatalið góða sem gott er að hengja á ísskápinn. Góða skemmtun og gleðilega hátíð!

Undirbúningur árshátíðar stendur sem hæst. Nemendur æfa á sviði og í heimilisfræðistofu eru bakað. Hópar nemenda taka upp stuttmyndir, laga til búninga og sviðsmyndir, eldri nemendur aðstoða yngri nemendur og svona mætti lengi telja. Allir eru mikilvægir og hafa einhverju hlutverki að gegna. Hlutverkin eru mörg og misjöfn en allir keppast við að láta dæmið ganga upp. Lokaæfingar eru á næsta leyti og síðan sjálfur árshátíðardagurinn sem margir bíða spenntir eftir. Upplýsingaver skólans er opið fyrir þá nemendur sem kjósa rólegheit. Myndir frá bakstri í heimilisfræðistofu.

Lið Brekkuskóla í spurningakeppni grunnskólanna gerði sér lítið fyrir og vann riðilinn. Keppnin fór fram milli grunnskóla á Norðurlandi, af svæði sem nær frá Skagafirði að Þingeyjarsýslum. Bestum árangri náði liðið í þeim hluta sem hafði að geyma hraðaspurningar, en þá náði liðið að svara 9 af 12 spurningum rétt. Liðið stóð uppi með eitt stig í mínus eftir fyrri umferðina en unnu þá síðar með 9 stigum. Árangurinn í hraðaspurningunum varð til þess að þeir unnu riðilinn og komust áfram í keppninni. Það veruður spennandi að fylgjast með framhaldinu. Við óskum drengjunum innilega til hamingju með frábæran árangur! Lið Brekkuskóla skipa þeir Halldór Heiðberg Stefánsson, Jóhannes Stefánsson og  Hallgrímur Hrafn Guðnason en þeir eru allir í 10. bekk FDG. Þess má geta að liðið var í alfræðivaláfanga í fyrravetur sem leggur grunn að undirbúningi keppenda í spurningakeppninni. Kennari í alfræði er Helena Sigurðardóttir. Ekki náðist í hóp í alvfræðiáfanga í vetur en vonandi verður hægt að mynda hóp aftur næsta vetur.

Ekki barnið mitt? Í dag, fimmtudaginn 21. nóvember frá kl. 17-19, verður haldið í Menningarhúsinu Hofi málþing fyrir alla sem koma að uppeldi barna og unglinga. Yfirskrift málþingsins er "Tölum saman". Spurt er spurninga á borð við þessar: Hver er ábyrgð okkar sem samfélags? Er vímuefnaneysla einstaklingsins bara hans mál? Ræða foreldrar sín á milli um félagslíf barna sinna? Hver er staðan á Akureyri? Dagskrá málþingsins er þessi: Ekki barnið mitt Jóhannes Kr. Kristjánsson faðir Sigrúnar Mjallar sem lést vegna ofneyslu fíkniefna aðeins 17 ára. Vímuefnaneysla grunn- og framhaldsskólanema. Hvað gerist milli skólastiga? Margrét Lilja Guðmundsdóttir sérfræðingur hjá Rannsóknum og greiningu. Tónlistaratriði Nemendur frá Verkmenntaskólanum á Akureyri. Hvernig er að vera foreldri fíkils? Inga Lóa Birgisdóttir. Fíkniefnaheimurinn á Akureyri Lögreglan á Akureyri. Tónlistaratriði Nemendur frá Menntaskólanum á Akureyri. Pallborðsumræður

Hér má sjá nemenasýningu í tæknimennt sem stendur yfir á brúnni um þessar mundir. Kennari í tæknimennt (smíðum) er Brynhildur Kristinsdóttir.

Það voru hressir og áhugasamir nemendur sem mættu til leiks í skákkennslu í síðustu viku. Leiðbeinandi er Andri Freyr sem er framhaldsskólanemandi og fyrrum nemandi Brekkuskóla. Andri Freyr er fyrrum skákmeistari  Brekkuskóla og hefur hann teflt í sjö ár. Andri Freyr leiðbeinir nemendum skák í sjálfboðaliðavinnu. Honum til aðstoðar eru Guðbjörn og Halldór Logi skólaliðar og starfsmenn Frístundar. Þess má geta að Halldór Logi er einnig fyrrum nemandi í Brekkuskóla. Alls voru sett upp fjögur skipti og eru tvö þeirra eftir. Næstu skipti verða 8. og 15. nóvember kl. 13:10 - 13:50. Skráning fer fram hjá Stellu deildarstjóra stella@akureyri.is  Hér má nálgast fleiri myndir frá kennslustundinni.

Gerður Ósk Hjaltadóttir kennir nemendum í 1., 6., 7. og 8.bekk sjálfstyrkingu, spuna og dans. Hér má sjá nokkrar myndir frá kennslustundum sem fara fram á sal skólans.

Fréttabréf nóvember er komið út. Meðal efnis í blaðinu er pistill skólastjóra, kynning á rafrænu námi í Brekkuskóla, kynning á Comeniusrmarkaði sem verður á árshátíð skólans, minnt á baráttudag gegn einelti, heimsókn rithöfundar frá Svíþjóð í elstu bekkina, lestraráskorun skólasafnsins, viðburðadagatal o.fl. Fréttabréf mánaðarins má nálgast hér.

Snjókast er leyfilegt á körfuboltavelli við norðanverðan skólann og á svæðinu við hliðina á römpunum. Þegar rætt er um snjókast við nemendur er mikilvægt að koma því á framfæri að nemendur hafi val um að taka þátt í slíkum leik á þessum svæðum. Annars staðar á skólalóð er snjókast ekki leyfilegt. Snjóbolta á aldrei að beina að andliti þeirra sem taka þátt í snjókasti og aldrei má kasta snjóbolta í átt að skólahúsnæðinu.