Fréttir

Þegar sólin hækkar á lofti og vel viðrar til útiveru er brýnt að minna á útivistarreglur og svefnþörf barna með það í huga að börnin þurfa fulla orku í skólanum. Það er eðlilegt við þessar breytingar að los komist á rútínu dagsskipulagsins og því enn mikilvægara að minna á þetta þar sem líðan barnanna í skólanum er í húfi.

Úr skólanámskrá: Reiðhjól, hjólabretti, línuskautar og hlaupahjól Nemendum er heimilt að koma á reiðhjólum í skólann frá 7 ára.  Það er mjög mikilvæt að gengið sé vel frá hjólum við skólann. Reiðhjól eru alfarið á ábyrgð nemenda og forráðamanna þeirra, einnig er það á ábyrgð foreldranna að nemendur noti öryggishjálm. Umferð reiðhjóla á skólalóð á skólatíma er bönnuð.

Veðrið hefur leikið við okkur og börnin tekið því fagnandi þegar farið er út fyrir dyr í ýmis konar hreyfingu.  Næstu vikur má gera ráð fyrir að nemendur fari í kennslu utandyra og skreppi í vettvangsferðir í næsta nágrenni.

Mánudaginn 4. maí fóru börnin í 1.bekk ásamt kennurum sínum á hádegistónleika í Akureyrarkirkju og hlustuðu á negrasálma. Það var  Haukur Ágústsson, söngvari, og Daníel Þorsteinsson, píanóleikari, sem fluttu sálmana. Nemendurnir hlustuðu með athygli og kunnu bersýnilega að njóta stundarinnar. Kærar þakkir til flytjenda og aðstandenda kirkjulistaviku frá Brekkuskóla.

Sólin skín og kennarar farnir að fara meira út með börnin til að leyfa þeim að njóta veðurblíðunnar. Ágústa handmenntakennari fer gjarnan með sína nemendur út ef færi gefst og í morgun voru ungar prjónakonur búnar að koma sér fyrir í einu skotinu. Þær kvörtuðu reyndar sáran yfir hita og ofbirtu, en ætli þær venjist því ekki fljótt? Verkefnin framundan í skólanum einkennast af útiveru og vettvangsferðum. Njótum góða veðursins og minnum hvort annað á að brosa með hjartanu.