Fréttir

Tölvur hafa verið vinsælar fermingargjafir síðustu ár og því vilja Heimili og skóli og SAFT vekja athygli foreldra á að þó að barnið eignist sína eigin tölvu minnkar ekki ábyrgð foreldra hvað jákvæða, ábyrga og uppbyggilega notkun barna þeirra á nýmiðlum varðar. Leiðbeiningarnar má nálgast hér.

4. bekkur hefur undanfarið safnað rusli og unnið úr því skemmtileg listaverk. Þau hafa komist að því að óhemju magn af rusli kemur frá heimilum á einni helgi, en þau söfnuðu ruslinu heima hjá sér eina helgi. Engu mátti henda og sáu krakkarnir heilmargt notagildi út úr þessu öllu saman. Sjá myndir frá listasýningunni í myndaalbúmi hér á vefnum.

Nemendur Brekkuskóla gerðu það gott á sundmóti um síðustu helgi. Sundfélagið Óðinn átti 18 keppendur á Íslandsmóti Sundsambands Íslands í Laugardalnum.

Miðvikudaginn 25. mars 2009 verður hæfileikakeppni miðstigs haldin. Keppnin kemur í stað söngvakeppni sem við köllum Brekkuvision en við höldum því heiti áfram. Keppnin fer þannig fram að hver bekkur leggur til eitt atriði sem kosið er um í undankeppnum innan bekkjanna og að lokum verða þrjú bestu atriðin valin á sjálfu Brekkuvision.

Við vekjum athygli á páskavef Námsgagnastofnunar þar sem safnað hefur verið saman fróðleik og verkefnum sem tengjast páskum og hafa birst undanfarin ár á síðunni Í dagsins önn. Á Páskavefnum er meðal annars að finna nýja grein um Hallgrím Pétursson ásamt verkefnum eftir Svanhildi Kr. Sverrisdóttur. Allt efni er á PDF formi til útprentunar.

Stóra upplestrarkeppnin í 7. bekk verður nú haldin í ellefta sinn á þessu skólaári. Lokakeppnin mun fara fram í Kvos Menntaskólans á Akureyri eins og undanfarin ár. Keppnin fer fram mánudaginn 16. mars 2009 kl.17:00 - 19:00. Undankeppni hefur farið fram hér í skólanum til að velja úr þá keppendur sem munu koma fram fyrir hönd skólans. Keppendur Brekkuskóla verða þeir Bjarmi Þórgnýsson Dýrfjörð og Alexander Jósep Blöndal. Til vara verða þær Steinunn Atladóttir og Sigrún Mary McCormicK

MÁLÞING UM RAFRÆNT EINELTI (sent beint út á vefsjónvarpi KHÍ, sjá hér neðar) Í tilefni að alþjóðlega netöryggisdeginum 10. febrúar stendur SAFT fyrir málþingi um rafrænt einelti í Skriðu, Háskóla Íslands, við Stakkahlíð, kl. 14.30 – 16.15. Á málþinginu, sem heilbrigðisráðherra setur, verður m.a. fjallað um: · tegundir og birtingaform rafræns eineltis · nýja rannsókn á rafrænu einelti · tæknilegt umhverfi rafræns eineltis · eftirlit foreldra · afskipti og meðferð lögreglunnar á rafrænu einelti · sál- og félagsfræðilegar hliðar eineltis Fundarstjóri verður Þorlákur Helgason, framkvæmdastjóri Olweusarverkefnisins á Íslandi. Þátttökugjald á málþing er ekkert en gestir eru vinsamlega beðnir um að tilkynna þátttöku á saft@saft.is. Boðið verður upp á veitingar. Sérstök athygli er vakin á því að málþingið verður einnig sent út á vefnum, vefslóð fyrir netútsendingu er http://sjonvarp.khi.is/.Nánari upplýsingar á heimasíðu SAFT,

Þann 11.febrúar er 112 dagurinn og því upplagt að nota tækifærið og minna á númerið. Það er alltaf  álitamál hversu mikla skyndihjálp á að kenna börnum. Engu að síður er mikilvægt að kenna þeim hvernig á að bregðast við og það er að kalla á fullorðin eða hringja í 1-1-2 til að fá hjálp. Þegar hringt er í 1-1-2 er mikilvægt að segja hvað gerðist og vera viðbúin að svara spurningum ekki slíta sambandinu því neyðarvörður ákveður hvenær nauðsynlegar upplýsingar hafa borist frá þér. Hægt er t.d. að nota tækifærið og fara yfir brunavarnir á ykkar heimili t.d ræða útgönguleiðir. Á vef slökkviliðsins undir liðnum forvarnir www.shs.is má sjá hvernig æfa má flóttaáætlanir fyrir fjölskylduna. Skólaheilsugæslan er með fræðslu um slysavarnir fyrir 4.bekk þar sem m.a. er rætt um skólalóðina og nánasta umhverfi, tannáverka, bílbelti, hjálmanotkun, neyðarnúmerið 1-1-2- svo dæmi séu tekin. Notið 112 daginn til að rifja upp hvernig þetta er hjá ykkur. Bestu kveðjur Skólaheilsugæslan Brekkuskóla

10. bekkingar hafa skipulagt dansleik í sal skólans í dag fimmtudag 4. febrúar 2009 kl. 16:00 - 18:00. Þar verður meðal annars farið í: ·  ásadans ·  limbó ·  hókí pókí ·  stoppdans · ofl. skemmtilegt Aðgangseyrir 300 kr. Sjoppan verður opin. (safi og bland í poka) 10. bekkingar