Göngum í skólann

Brekkuskóli hefur ákveðið að taka þátt í Göngum í skólann, verkefni á vegum Íþrótta- og Ólympíusambands Íslands, Embætti landlæknis, Mennta- og menningarmálaráðuneytisins, Ríkislögreglustjóra, Samgöngustofu, Slysavarnarfélagsins Landsbjargar og Heimilis og skóla.
Megin markmið verkefnisins eru að hvetja börn til að tileinka sér virkan ferðamáta í og úr skóla og auka færni þeirra til að ferðast á öruggan hátt í umferðinni. Fræða þau um ávinning reglulegrar hreyfingar, að draga úr umferðarþunga, mengun og hraðakstri nálægt skólum. Auk þess er reynt að stuðla að vitundarvakningu fyrir virkum ferðamáta og umhverfismálum og það hversu „gönguvænt“ umhverfið er. Á síðasta ári tóku milljónir barna frá 40 löndum víðs vegar um heiminn þátt í Göngum í skólann með einum eða öðrum hætti. Nánari upplýsingar um verkefnið er að finna á vef þess www.gongumiskolann.is 

Göngum í skólann í okkar skóla 
Við hefjum verkefnið mánudaginn 11. september og mun það standa yfir í tvær vikur. Umsjónarkennarar munu í samstarfi við íþróttakennara halda utan um skráningu í öllum árgöngum sem keppa sín á milli um gullskóinn.  Nú þegar hafa nemendur fengið afhend endurskinsmerki til að auka sýnileika í umferðinni, en gott er einmitt að huga að þeim málum um þessar mundir.  

Vonandi gengur þetta vel hjá okkur. Verum endilega opin fyrir þessu og jákvæð og nýtum haustið til að vekja athygli á hreyfingu og öryggi barnanna okkar á leiðinni í skólann.  

Gangi okkur vel:-)