Frábær danssýning

1. - 4. bekkur fékk frábæra heimsókn í dag. Það voru Ernest Camilo Aldazabal Valdes dansari frá Kúbu og Anna Richardsdóttir gjörningadanslistakona frá Akureyri. Hér má nálgast myndir frá danssýningunni sem vakti mikla lukku meðal áhorfenda. Áhorfendur fengu tækifæri til að taka þátt sem vakti ekki síður mikla kátínu. Myndirnar tala sínu máli. Sýningin var í boði foreldrafélags Brekkuskóla og eru þeim færðar sérstakar þakkir.

Camilo og Anna hafa samið sögu um gyðjuna Freyju og Kúbverska guði og gyðjur. Anna segir söguna og dregur börnin með frá íslensku fjöllunum, snjónum og kuldanum á vit framandi slóða. Hún notar orð, hreyfingar, dans og hluti til að segja frá. Camilo dansar bæði nútímadans og hefðbundinn Afró-Cuban dans í verkinu og túlkar á leikrænan hátt hin ýmsu hlutverk. Börnin urðu partur af sýningunni og dansa með tveimur Ellegua-guðum frá Kúbu.  Að lokum flýgur þetta ólíka par sem einn fugl á vit nýrra ævintýra.

Camilo er frá Kúbu og er með mikla og góða menntun sem dansari að baki. Hann sótti virtan dans-barnaskóla 12 ára gamall, eftir að hafa dansað og numið dans á vegum dansskóla  frá 8 ára aldri. Eftir það lauk hann prófi frá þekktasta dansmenntaskóla Kúbu, ENA, og hefur nú verið nemandi á dansbraut í virtasta listaháskóla á Kúbu, ISA,  undanfarin tvö ár. Anna og Camilo eru einstaklega ólík og það er líka mikilvægt að sjá tvær mismunandi kynslóðir frá ólíkum menningarheimum mætast svona á sviði í dansi. Dansinn sameinar, óháð aldri, litarhætti, stíl og kyni. Anna er listakona frá Akureyri með 37 ára dansferil að baki . Hún nam í Þýskalandi á  árunum 1980 til 86 og ber með sér evrópska strauma sem mæta hér  kúbverskri hefð og klassík. Anna dvaldi veturlangt í fyrra með fjölskyldu sinni við nám í ISA  og lagði stund á Afró-Cuban dansana. Verkið er frumraun í samstarfi þeirra.